SEMANA SANULU-RESIN-NEEN

semana sanulu-resin-neen ona

poeta perpétua iha inan-nia knotak
poeta perpétua iha inan-nia konseisaun

ó furak *naksahi
**nu’u au nadubun
nu’u ai-horis nafunan  
ó ain murak komesa bidu
komesa tebe liku rai
***ó nakfukar no nakfekit ba-maió fuan baku maka’as
sirkula ran liberdade

ó tilun kmo’ok nakfera
rona lian hafanu no haksolok
hein tan ouituan poeta perpétua
semana sanulu-resin seluk tan

atu hare mundu nia furak
atu la’o iha ó-nia dalan rasik
atu esperiensia domin no rezeisaun
atu luta interna kontra an rasik
iha jardin Getsêmani
luta ba hetan vitória eterna

_________________

Husi:Hernanio Morato

Dili: 6.6.2019

Foto: Sheryl Cozad www.sherylcozad.com

_________________________________ 

*Port. naksahi v. (partidu, divididu)
**Port. nu’u / nuudár konj. (como; assim como; da mesama forma que; de modo que.)
***Port. nakfukar v. (contorcer-se / Eng. Squirm); katak halo movimentu barak nerboju, deskonfortável, entediadu.

Antagonizmu

antagonizmu "ha'u" ho "ó"
la'ós ona ita
hateke kalohan metan
sente udan turuk ida
iha fulan Maiu nia rohan
turuk habokon
kontamina kakutak
kontamina ho lixu polítika
antagonizmu ha'u ho ó

se la'ós ona ita
oinsa liberta an?
oinsa liberta ita?
oinsa liberta povu?
oinsa liberta patria?
se ita iha antagonizmu

_________________
Poems: Hernanio Morato (
Dili, 2 Juñu 2018)

Photo by: Antagonism, 1974

Irving Norman

VIDA NE'E FESTA IDA

moris ne’e rítmu
moris ne’e póezia
moris ne’e dansa
moris ne’e tebe likurai
persija kaer liman rua
hodi tebe
hodi bidu
hodi dahur
hodi hananu
dadolin ksolok
tuir rítmu moris nian
hananu dadolin
harahun didin-loloon egoizmu
harahun imperializmu foun
harahun eskravidaun foun
loron ida rítmu sei para
maske laloran ondas laek


__________________________
Hakerek Husi: Hernanio Morato
Dili, 25 Setembru 2018

1999

1999 povu vota ba ukun an,
ohin-loron vota ba promesa falsu.
1999 povu duni opresor ho pregu,
ohin-loron veteranu barak mak falsu
1999 povu sai atan ba opresor,
ohin-loron sai atan ba servidor
1999 "mate ka moris ukun rasik an"
ohin-loron oportunista buka moris ba nia an
1999 ba kotuk moris jerasaun unidade no lutador
ohin loron moris jerasaun individaulizmu no supador no prometedor
1999 o luta mak hetan justisa
ohin loron ho osan sosa justisa
1999 ba kotuk eroi nasional
ohin loron eroi ba grupu de'it keta fiar nanal sanak temi povu
tanba uluk to'o ohin loron sai vítima sempre povu

_________________________
Hakerek husi: Hernanio Morato
Imazen: google.com
Dili, 30 Agostu 2018

POVU IHA PIRAMIDA OKOS

ami mak povu
ami mak atan
ami mak atan iha piramida nia okos
Iha okos, iha kraik no iha kidun liu ne'e
hanesan foho, be matan moris iha foho tutun
Buras uluk iha foho tutun
Matak malirin uluk iha foho tutun
Sulin tuun la too kraik
La to'o tetuk
maran de'it iha foho loloon sira
iha tetuk maran hanesan dezertu mesopotamia no sahara
Ami mak iha kraik ne'e
falun ho rai rahun ne'e,
mas ami la sente
iha tetuk ne'e
iha rai maran ne'e
iha dezertu ne'e
ami atu ruun fali de'it ruin maran ne'e
Ami mos lasente mate neneik
Iha piramida okos ne'e

________________________________
Hakerek husi: Hernanio Morato
Dili, 23 Agostu 2018

BAZARTETE

Loron matan sa'e as
ho anin fresku hamaran mahoween
Aroma husi ai-tahan-matak
husi diik-funan
Husi kafé-funan
husi ai-horis hotu nia-funan
Su'ar sai
Morin,
Kahor hafutar,
Habelar hafalun
Hakmook no enfeita
Hanesan mina-morin
Folin lalehan ho rai nian
Nakfakar iha foho lolon sira
Iha rai horik fatin heroi sira
O bele sente nia morin iha fatin-fatin
Iha Bazartete
______________________________
Poezia ho foto husi Hernanio Morato
Bazartete, 18/08/2018

Promesa

Nabeen iha o-nia hamansa furak
Mout iha o-nia liafuan murak
Ohin kalohan nakloke
Hanesan uma kakuluklaek
Ohin kalohan nakloke
Sujeridu o-nia prezensa
Ohin kalohan nakloke liutan
Naroman husi rohan-ba-rohan
Fuan fekit makaas
Fekit hanesan atu rahun salsala
Atu rahun tanba sente o-nia prezensa
Maibé iha ne'ebé o ho o-nia promesa
Maibé iha ne'ebé o-nia prezensa
  O mak mai ne'e
Eh ha'u tenke hein
Hein tan promesa seluk
Hein tan liafuan murak seluk
Hein tan hamnasa furak seluk
Hodi halo hau mout nabeen
Nafatin iha o-nia promesa

____________________
Dili, 1 Agostu 2018
Hernanio Morato
Imajen: google.com